Шкулта чăваш чĕлхи эрни пынă май ака уйăхĕн 24-мĕшĕнче 8 класра «И.Я.Яковлев тата чăваш ҫыравҫисем» темăпа уҫă урок иртрĕ. Урок пуҫламăшĕнче вĕренекенсем малтанах И.Я.Яковлева халалласа ҫырнă Чăваш халăх поэчĕн А.Е.Алкан «И.Я.Яковлев» ятлă сăввипе паллашрĕҫ. Сăвва Лазарева Татьяна питĕ ăста вуласа савăнтарчĕ. Аслă Патриархăмăр пурнăҫĕпе ĕҫне-хĕлне кĕскен тишкерсе тухнă хыҫҫăн вĕренекенсем Чĕмпĕрти чăваш шкулĕнче вĕреннĕ чăваш ҫыравҫисемпе – Н.М.Охотниковпа, Тайăр Тимккипе, К.В.Ивановпа тата Трубина Мархвипе тĕл пулчĕҫ. Н.Охотников рольне Лукин Роман вылярĕ, Тайăр Тимккине – Зеленов Гаврил, К.Иванова – Ефимов Андрей, Трубина Мархвине - Игнатьева Наталья. Ҫыравҫăсен рольне выляканскерсем вĕсен пурнăҫĕ ҫинчен каласа пачĕҫ, сăввисене вуларĕҫ, ачасем панă тĕрлĕрен ыйтусем ҫине хуравларĕҫ. Урок И.Я.Яковлев «Халалне» вуланипе вĕҫленчĕ.